Սույն թվականի հունվարի 27-ին ՀՀ Գիտությունների ազգային ակադեմիայում տեղի ունեցավ ՀՀ ար­վես­տի վաստակավոր գործիչ, ՀՀ ԳԱԱ Արվեստի ինստիտուտի երաժշտության բաժնի առաջատար գի­տաշ­խա­տող, արվեստագիտության դոկտոր, պրոֆեսոր Աննա Սենի Արևշատյանի «Տիգրան Մանսուրյան» մենագրության շնորհանդեսը։ Գիրքը նվիրված է Հայաստա­նի ժողովրդական արտիստ, անվանի կոմպոզիտոր Տիգրան Եղիա­յի Մանսուրյանի ծննդյան 85-ին ամյակին։ Մենագրությունը ՀՀ ԳԱԱ Արվեստի ինստիտուտի գիտական խորհրդի որոշմամբ հրատարակել է ՀՀ ԳԱԱ «Գիտություն» հրատարակչությունը։

Աշխատության խմբագիրն է արվեստագիտության դոկտոր Լևոն Հակոբյանը (Մոսկվա), գրախոսներն են արվեստագիտության դոկտոր, պրոֆեսոր Աննա Ասատրյանն ու արվեստագիտության դոկտոր, պրոֆեսոր Մհեր Նավոյանը։

Աշխատությունը Տիգրան Մանսուրյանի ստեղծագործական գործունեության ուսումնասիրությանը նվիր­ված առաջին գիտական հետազոտությունն է, որտեղ հեղինակը քննության է առել կոմպոզիտորի բազմաժանր ստեղծա­գոր­ծությունը, նրա առնչությունները 20-րդ դարի համաշխարհային երաժշտությանը, հա­մագործակցությունը մի շարք երևելի երաժիշտ-կատարողների հետ, ինչպես նաև՝ կոմ­պոզիտորի գեղագիտական հայացքները:

Հեղինակը կազմել է Տիգրան Մանսուրյանի ստեղծագործությունների ցանկն ու կոմպոզիտորի մասին առկա մատենագիտությունը, գիտական շրջանառության մեջ դրել կոմպոզիտորի անձնական արխիվում պահվող կարևոր վավերագրեր և լուսանկարներ։

«Տիգրան Մանսուրյան» գիրքը լույս է տեսել Երևանի քաղաքապետարանի աջակցությամբ։

Մանրամասն շնորհանդեսի վերաբերյալ տե՛ս Լուրերի տեսանյութը և Թերթ.am ու sci.am կայքերում լույս տեսած հոդվածները:

Պատկերասրահ